PISTANG PAMASKO SA OVAL 2007

Mga Alituntunin sa Pagtatayo ng Booth
at Paligsahan ng mga Booth

I.  Panuntunan para sa pagtatayo at pagbibihis ng mga booth

1. Konsepto

      Ang Pistang Pamasko sa Oval ay gaganapin mula ika-3 hanggang ika-23 ng Disyembre sa academic oval, maghapon hanggang ika-9 ng gabi.  Sa gabi ng Parada ng mga Parol, Disyembre 19, maaaring manatiling bukas ang mga booth hanggang ika-10 ng gabi.  Ito ay eksibit ng mga publikasyon, likhang-sining, imbensiyon, interactive na presentasyon at iba pang maipagmamalaki ng mga akademikong yunit at mga mag-aaral.  Para mas masaya, isasali ang bazaar o tiyangge ng mga meryenda, panregalo atbp. 

2. Mga maaaring sumali

      Ang mga akademikong yunit, kinikilalang organisasyong pang-mag-aaral at unyon ng mga kawani ang mga pangunahing eksibitor.  Maaaring ipagbili ang mga publikasyon, likhang-sining at mga produkto ng mga kolehiyo o organisasyon.

      Maaaring sumali ang mga pribadong konsesyoner ng pagkain at mga panregalong gaya ng dry goods upang lalong maging masaya ang pista.  Pamamahalaan ito ng Business Concessions Office (BCO).  Basahin sa ibaba ang mga alituntunin ukol ditio.

3. Proseso ng pagsali bilang eksibitor o konsesyoner

      Pumunta sa opisina ng BCO upang punan ang ilang form.  Bago magawaran ng booth, kailangan ang mga sumusunod:

      Akreditasyon mula sa BCO, na ibibigay pagkatapos punan ang mga forms para dito at, maliban sa mga kolehiyo, pagkatapos bayaran ang upa sa booth nang hindi lalampas sa ika-3 ng Disyembre 2006.  Kung nais ng kolehiyo ng higit sa isang booth, may bayad na ang ikalawa at ikatlong booth.  (Tingnan ang detalye sa ibaba.)  Kailangan ding magsumite ng logo ng yunit, na may lapad na hindi hihigit sa 2 X 2 talampakan, anumang hugis, na magsisilbing karatula ng booth. 

      Lahat ng nais sumali na mga organisasyong pang-mag-aaral ay dapat munang humingi ng sertipikasyon mula sa Office of Student Activities (OSA) na sila ay kinikilalang organisasyon sa taong ito.  Kung mga organisasyong pang-mag-aaral na naka-base sa mga kolehiyo, ipakita sa OSA ang sertipiko ng pagkilala ng kolehiyo.  Matapos makuha ang mga sertipikong nabanggit, maaari nang pumunta sa BCO.  Kung magsasanib ang dalawa hanggang apat na organisasyong pang-mag-aaral sa isang booth, isang aplikasyon lamang ang pupunan, ngunit kailangang ang bawat kasanib ay magsumite ng mga sertipikong hinihingi.  Pagsama-samahin ang lahat ng mga sertipiko.  Hindi maaaring i-sub-lease ang mga booth.

      Ang University Student Council ay maaaring dumeretso na sa BCO, pero ang mga college student councils ay kailangan ng sertipiko ng Kalihim ng Kolehiyo.

4. Kaayusan ng mga booth

      Upang mapagbigyan ang kahilingan ng mga nais sumali, papayagang pumili ang mga kalahok ng lugar ng kanilang booth.  Mas maagang magpapatala, mas makakapili. 

           May sukat na 12 X 12 talampakan ang bawat tent na siyang magsisilbing booth, na may taas na walong (8) talampakan, at may bubong na yari sa canvas.  Maaaring umupa ng isa hanggang tatlong booth.  Kung uupa ng dalawa o tatlong booth, itatayo ang mga ito nang magkakatabi. 

      Hindi maaaring magdala ng sariling tent; ang opisyal na tent lamang ang maaaring gamitin at upahan, na uupahan rin ng administrasyon sa isang supplier.  Ngunit kanya-kanyang dala ang mga eksibitor ng mesa, upuan, panel board atbp.  Tanging eksepsiyon: Mga komersiyal na konsesyoner ng pagkain, na maaaring magdagdag ng sariling booth na kakikilanlan sa kanila, sa tabi ng booth na uupahan sa administrasyon, pero may dagdag na singil batay sa sukat ng okupadong espasyo ng karagdagang booth.
     
           Hindi maaaring pintahan ang mga haligi at bubong ng booth.  Bawal ring pakuan ang mga ito ng kahit ano tulad ng paglalagay ng karagdagang habong.  Mahigpit na ipinagbabawal ang anumang makasisira sa mga booth.  Inaasahang pananatilihin ng bawat eksibitor ang kalinisan at kaayusan ng kanya-kanyang booth at paligid.  May basurahan dapat ang bawat booth upang maiwasan ang kalat.  Papatawan ng P1,000 multa ang sinumang konsesyoner na ‘di makapagpapanatili ng kaayusan at kalinisan sa kanilang booth at kapaligiran sa lahat ng pagkakataon.

           Hindi maaaring sakupin ng eksibitor ang espasyo sa labas ng kanyang booth.  Subalit ang parol na kasali sa paligsahan ay maaaring ilagay sa layong hindi hihigit sa isang metro mula sa harap o tagiliran ng booth.  (Basahin ang Alituntunin para sa Paligsahan ng mga Parol.)

           Para sa maayos, ligtas at masayang Pistang Pamasko sa Oval, magiging one-
       Way ang oval sa mga sasakyan mula ika-3 hanggang ika-23 ng Disyembre.

5. Halaga ng upa

1. Akademikong yunit – Buo ang subsidyo – o libre – para sa unang booth ng mga kolehiyo: sasagutin ng administrasyon ang upa nito.  Kasama dito ang tent at koneksiyon sa koryente, pati ang konsumo ng koryente.   Kanya-kanyang dala ng bombilya ng ilaw at extension cables ang mga eksibitor, na hindi maaaring sindihan bago mag-ika-5:30 ng hapon, at kailangang patayin ika-9 ng gabi, maliban sa ika-19 ng Disyembre kung kailan maaaring manatiling bukas ang mga booth, kung nanaisin, hanggang ika-10 ng gabi. 

       Ngunit kung nais ng kolehiyo ng ikalawa at ikatlong booth, may kaunting
       babayaran bawat karagdagang booth pero may subsidyo pa rin.  Makipag-
       ugnayan sa BCO para dito.

1. Estudyante at kawani – Para naman sa mga organisasyong pang-mag-aaral at mga kawani, may subsidyo rin ng administrasyon ang upa na sapat lamang para sa halaga ng booth.  Makipag-ugnayan sa BCO para dito. Kanya-kanyang dala ng bombilya ng ilaw at extension cables ang mga eksibitor, na hindi maaaring sindihan bago mag-ika-5:30 ng hapon, at kailangang patayin ika-9 ng gabi, maliban sa ika-19 ng Disyembre kung kailan maaaring manatiling bukas ang mga booth, kung nanaisin, hanggang ika-10 ng gabi. 

Kung nanaisin, maaaring magsanib ang mga organisasyong pang-mag-aaral nang hindi lalampas sa apat na organisasyon bawat booth upang mapaghatian ng mga sasali ang halaga ng upa.  Tingnan sa itaas ang proseso ng pagsali.  Hindi maaaring i-sub-lease ang mga booth.

1. Konsesyoner ng pagkain at mga paninda – Maaaring upahan ang mga booth mula ika-3 hanggang ika-23 ng Disyembre.  Makipag-ugnayan sa BCO para dito.  Kanya-kanya ring dala ng mga bombilya ng ilaw, extension cables at iba pang kagamitan gaya ng mesa at silya.  Hiwalay ang bayad para sa konsumo ng koryente.  Maglalagay ng pansamantalang metro ng koryente sa bawat booth ng konsesyoner.

6. Mga karagdagang alituntunin para sa mga konsesyoner ng pagkain at iba pang paninda at serbisyo

      1.  Konsesyoner ng pagkain

1. Hindi maaaring magbenta ng mga inumin sa bote. 

2. Mahigpit na ipinagbabawal ang pagbebenta ng mga inuming nakalalango o nakalalasing.

3. Maaari lamang magbenta ng mga tinimplang inumin gaya ng sago/gulaman kung nakalagay ito sa sarado o selyadong lalagyan.

4. Maaaring magdala ng hindi hihigit sa dalawang (2) mesa at walong (8) silya.

5. Hindi pinapayagan ang mga heavy-duty equipment at industrial cooking equipment.  Dapat lutô na ang mga ibebentang pagkain bago dalhin sa mga booth.  Ang paghahanda at pagluluto ng mga hilaw na pagkain ay hindi maaaring gawin sa mga booth.  Pinapayagan ang maliliit na kagamitan para mag-init ng pagkain gaya ng oven toaster at microwave oven.  Dapat magdala ang konsesyoner ng sariling LPG kung kailangan ito. 

6. Tungkulin ng mga konsesyoner na panatilihin ang kalinisan sa loob ng booth at sa kanilang paligid.  Kailangang magdala ng basurahang sapat ang laki para sa basurang maiiwan ng mga kakain.  Dapat ay hiwa-hiwalay ang basurahan para sa mga nabubulok, di-nabubulok at recyclable na basura.

7. Sa ika-19 ng Disyembre 2007, maaaring manatiling bukas hanggang ika-10 ng gabi. 

      2.  Ibang konsesyoner

1. Hindi maaaring magbenta ng pagkain o inumin ang mga konsesyoner ng dry goods.

1. Hindi maaaring magbenta ng mga pirated merchandise, mga kutsilyo at iba pang bladed weapons, at mga kagamitang maaaring makasakit.

1. Tungkulin ng mga konsesyoner na panatilihin ang kalinisan sa loob ng booth at sa kanilang paligid.  Kailangang magdala ng basurahan.  May multang P1,000 kapag lumabag dito.

7. Iba pang karagdagang alituntunin

1. Bawal ang mga malalakas na musika at iba pang ingay sa mga booth na gagambala sa mga klase.

1. Hindi mananagot ang administrasyon para sa mga kagamitang maaaring mawala o manakaw mula sa mga booth kayat ipinapayo na iuwi ang lahat ng gamit sa booth o kaya’y ipatago sa mga kolehiyo tuwing gabi.

Makipag-ugnayan sa BCO kung kailangan ng karagdagang impormasyon.