print preview

Bagong direktor ng SWF, dating dekana ng KAL

(Pebrero 16)—Sumumpa sa tungkulin bilang direktor ng Sentro ng Wikang Filipino (SWF) si Dr. Rosario Torres-Yu, dating dekana ng Kolehiyo ng Arte at Literatura (KAL), sa pamamatnubay ni Tsanselor Caesar A. Saloma noong Enero 31 sa Opisina ng Tsanselor.

Si Yu ay propesor sa KAL at nagtuturo ng andergradweyt at gradweyt na antas sa ilalim ng Departamento ng Filipino at Panitikan ng Pilipinas (DFPP). Nagtapos siya sa UP Diliman ng mga digring doctoral sa Philippine Studies sa Kolehiyo ng Agham Panlipunan noong 1987, masteral sa Panitikan ng Pilipinas sa KAL taong 1977 at batsilyer (BA Education) sa Kolehiyo ng Edukasyon, cum laude, taong 1970.

Siya ay nanungkulan bilang dekana mula taong 2000 hanggang 2003. Siya ay naging Bise Tsanselor para sa Gawaing Mag-aaral  noong 1993 hanggang 1996 at Tagapangulo ng DFPP mula taong 1985 hanggang 1988. Naging kasapi siya ng maraming komite sa antas ng UP System at ng Diliman. Pinakahuli sa mga gawaing ito ang pagiging kasapi ng UP Diliman Oversight Committee on Admission noong 2010 hanggang sa kasalukuyan, ng Committee to Draft IRR on the Magna Carta of Women noon ding 2010 at ng Committee on Professor Emeritus ng Humanities Cluster mula 2010 hanggang sa kasalukuyan.

Mula 1988 hanggang 1992, naging Visiting Professor ng Philippine Studies si Yu sa Osaka University of Foreign Studies, Japan.  Katuwang si Propesor Mamuro Tsuda, nailathala niya ang librong Express Firipingo ng Hakuishusa Publishing sa Tokyo, Japan. Sa Japan niya rin naisalin mula sa Ingles ang Mado Giwa no Totto Chan ng tanyag na aktres at manunulat na Hapon na si Tetsuko Kuronayagi sa taguyod ng Daido Life Foundation (DLF). Ang mga kopya ng naturang isinalin na akda ay ibinigay sa mga pampublikong aklatan sa Japan at Pilipinas sa tulong ng Cultural Center of the Philippines. Naging bahagi rin siya ng proyektong pagsasalin sa wikang Nihonggo ng nobela ni Amado V. Hernandez na Luha ng Buwaya, na isinalin ni Junko Hachiya at inilathala ng DLF.

Siya ay premyadong awtor, editor at tagapagsalin ng mga aklat tungkol sa wika, panitikan, kasarian, kilusang manggagawa, kapayapaan at panitikang pambata. Kinilala siya ng Unibersidad sa kanyang malikhaing panulat at iskolarsyip sa panitikan sa pamamagitan ng UP Artist Productivity Award (2009-2011), ang pagiging guro sa pamamagitan ng Gawad Chanselor para sa Natatanging Guro (2008), at ang mga saliksik niya sa pamamagitan ng UP Centennial Professorial Chair (2008 at 2010) at UP Centennial Faculty Grant (2009 at 2011), International Publication Award (2009 at 2010) at Gawad sa Natatanging Publikasyon sa Filipino (2001).

Sa kasalukuyan, nakatuon ang kanyang mga pananaliksik sa mga usapin ng panitikang pambata at kritisismo. Ilan sa kanyang mga pananaliksik tungkol dito ay nailathala na sa internasyunal at lokal na publikasyon. Naging kasapi rin siya ng  International Research Society for Children’s Literature. Taong 2011, nailathala ang kanyang aklat na pinamagatang Balagen: Edukasyong Pangkapayapaan at Panitikang Pambata na resulta ng kanyang mga pananaliksik. Nailathala rin ang dalawa sa kanyang kuwentong pambata: Si Onyo at ang Mahiwagang Kuneho (sa Liwayway Magazine) at ang story book na Hardinerong Tipaklong (sa LG&M Corporation) na kasama sa listahan ng inirerekumendang mga libro ng Philippine Board on Books for Young People noong 2007. Maging ang kuwentong pambata na Si Butbot, Ang Paniking Batibot ay nailathala rin sa Liwayway noong Disiyembre 2011.

Inilathala ng University of Sto. Tomas Publishing House ang kanyang pinakabagong libro sa panunuring pampanitikan, ang koleksiyon ng sariling mga panunuring pampanitikan, ang Alinagnag, Panunuring Panlipunan sa Panitikan noong 2011. Sa kasalukuyan, siya ay may proyekto tungkol sa kasaysayan at kritisismo ng malaganap na anyo ng panitikang pambata, ang retelling o muling pagsasalaysay, sa taguyod ng UP Research and Creative Scholarship na iginawad noon ding nakaraang taon. —H.C.P.