print preview

Karolfest 2009

            Upang lalong pasiglahin ang Pamaskong Palatuntunan sa taong ito, ipagpapatuloy ng Office for Initiatives for Culture and the Arts (OICA), Office of the Vice Chancellor for Student Affairs (OVCSA) at ng University Student Council (USC) ang ngayo’y taunan nang Karolfest.  Ito ay paligsahan ng mga pinakamahuhusay na koro mula sa hanay ng mga estudyante.  Magtatagisan ng galing sa pag-awit ng mga Christmas carols o mga Pamaskong awit ang mga amatyur na koro na binubuo ng mga estudyante ng iba’t ibang kolehiyo sa UP Diliman.

 

ISKEDYUL NG PALIGSAHAN

            Pagpili ng mga kinatawan ng kolehiyo:  Simula ngayon hanggang umaga ng Biyernes, Nobyembre 27.  Pamamahalaan ito ng College Student Council.

            Pagpapatala ng mga pangalan ng kinatawan at mga pamagat ng aawitin:  Magpatala sa opisina ng OICA sa kanang lobby ng University Theater hanggang sa Biyernes, Nobyembre 27.  Ilakip ang sertipiko mula sa Kalihim ng Kolehiyo na nagpapatunay na ang mga miyembro ng koro ay mga rehistradong mag-aaral ng kolehiyong kinakatawan.  Mas mainam kung may kalakip na larawan para sa publisidad.  Ang mga isusumiteng pamagat ng mga napiling awitin ay hindi maaaring palitan pagkaraan ng Miyerkoles, Disyembre 2.

            Araw ng paligsahan:  Miyerkoles, ika-9 ng Disyembre, ika-3 hanggang ika-7 ng gabi, sa University Theater.

 

MAHALAGANG MALAMAN

            Upang makapaghanda para sa paligsahang ito, maaaring humingi ng tulong pinansiyal sa OICA, na handang magbigay ng P3,000 bawat College Student Council na sasali sa palatuntunan.  Isumite ang aplikasyon hanggang sa Biyernes, Nobyembre 27.  Ang paghingi ng tulong pinansiyal ay ituturing na pangako ng pagsali sa Karolfest 2009 at pag-awit sa Paskong Palatuntunan sa gabi ng Parada ng mga Parol.

 

MGA ALITUNTUNIN

Sino ang maaaring sumali:

  1. Mga rehistradong estudyante ng kolehiyong kakatawanin.
  2. Isang koro lamang bawat kolehiyo.
  3. Ang mga kaanib ay hindi kukulangin sa 8 at hindi hihigit sa 16.
  4. Mga amatyur na mang-aawit.  Hindi maaaring isali ang mga miyembro ng mga official performing groups ng Unibersidad.
  5. Maaaring kumuha ng konduktor mula sa mga official performing groups ng Unibersidad, kahit hindi estudyante ng kolehiyong kinakatawan, o kaya ay mula sa College of Music, ngunit dapat ay estudyante rin ng UP Diliman.  Hindi kasama sa bilang ng 16 na miyembro ang konduktor.
  6. Bilang pagtugon sa mga mungkahi nuong nakaraang taon, maaari nang saliwan ng piano ang pag-awit.  Ang tutugtog ng piano, na ipahihiram ng OICA, ay dapat na estudyante ng Unibersidad, na maaaring manggaling sa Kolehiyo ng Musika.  Hindi siya kasama sa bilang na 16.

 

Mga aawitin

            Awitin ang mga sumusunod:

  1. Isang competition piece, na aawitin ng bawat koro: “Noche Buena” na komposisyon ni Felipe de Leon;
  2. Isang awiting Pamasko sa alinmang wikang Filipino (any Philippine language) na pipiliin ng kalahok; at
  3. Isang awiting Pamasko sa alinmang wika na pipiliin ng kalahok.

 

Takdang oras

            Bawat koro ay dapat umawit ng nakatakdang 3 awitin sa loob ng 10 minuto lamang.  May bawas sa score kapag lumampas sa takdang oras.  Kapag humigit sa 12 minuto ang pagtatanghal, maaaring patigilin ng mga organizers.

 

Inampalan at batayan ng pagpili

            Pipiliin ng OICA ang mga bubuo ng 3 miyembro ng lupon ng inampalan.  Kabilang ang mga sumusunod sa batayan ng pagpili ng mga tatanghaling pinakamagagaling ng koro: interpretive skills, technique (voice quality, diction, tonal quality, collaborative ability), overall musicianship, at stage presence (projection/ presentation, costume, audience impact).

 

Mga karagdagang alituntunin

  1. Ang areglo ng competition piece ay ibibigay sa mga kalahok na koro sa sandaling sila ay magpatala.
  2. Ang pagkakasunod-sunod ng pagtatanghal ng mga koro ay sang-ayon sa bunutan na gaganapin sa harap ng kinatawan ng lahat ng grupong kasali.
  3. Hindi maaaring may hawak na kodigo ng awit (salita o nota) ang mga koro.
  4. Hindi maaaring umawit ang mga konduktor at mga tutugtog ng piano.
  5. Hindi maaaring magdala ng sariling sound at lighting system.
  6. Maaaring i-disqualify ng mga organizers ang mga lalabag sa alituntunin.

 

Mga magwawagi

            Itatanghal ang mga magwawagi sa Paskong Palatuntunan pagkatapos ng gabi ng Parada ng mga Parol sa Disyembre 18, matapos pangunahan ng lahat ng koro ang community singing ng mga awiting Pamasko.  May mga premyong naghihintay para sa mga magwawagi!

 

MAKIPAG-UGNAYAN SA OICA (nasa kanang lobby ng University Theater)
PARA SA IBANG DETALYE.  HANAPIN SI Bb. Phoebe Rostrata.